講到英國嘅老牌球會，點可以無紐卡素嘅一份。1892年成立，有124年歷史，綽號係叫喜鵲。
1969年球會出現第一個會徽，基本上係抄紐卡素市徽。會徽上的城堡建築物，係一座位於泰恩河畔，中世紀時期興建嘅要塞。會徽上面兩隻海馬，象徵呢個地方同海有密不可分嘅關係。底部句拉丁文，意思係靠勇敢嘅防守就可以得勝，呢個會徽用到1976年啫。
第二代會徽得七年命仔，黑色嘅圓形框住屬於地標嘅要塞，多咗條泰恩河同埋一隻喜鵲，外圈就寫住「NEWCASTLE UNITED FOOTBALL CLUB」。
第三代會徽個設計都好簡單，NUFC四個字組成一個圓形，將字母C向右轉90度，覆蓋隻喜鵲。呢個會徽比起之前仲短命，五年後就被換成依家呢一代嘅會徽。
心水清嘅球迷或者會發現，第四代會徽同第一代好似，只係用唔同顏色重新設計。第一代會徽嘅三個城堡，變成代表球隊主場波衫嘅黑白直間，另外底部嘅拉丁文亦無咗，變成「NEWCASTLE UNITED」