今季四捷良駒陸續有來！繼兩大灰獸「平湖之星」（12月17日）及「五十五十」（1月1日）先後完成此壯舉後，今午（7日）再有羅富全馬房「紅衣優駿」，配田泰安勝出第四場三班田草1600米，係羅富全從練首匹一季四捷馬，今場單Win及組合獨贏A1分別派16及14元。
「紅衣」系馬主陣營專養靚馬，上月攻下香港短途錦標的「紅衣醒神」不在話下，「紅衣優駿」亦唔失禮，轉投羅廐至今五戰四冠一亞，由季內首戰53分直線升到這天賽前74分，足足多咗21分仍未止境。
「紅衣優駿」今場沿途守三四位，質超關係全程在外疊蝕位亦冇有怕，結果末段一衝即贏1.75馬位之多。比對本身上季出道養於容天鵬馬房，在容廐七戰不勝最叻第四，同一匹馬今季在羅富全手上，好似脫胎換骨咁，「紅衣優駿」堪稱他的招牌貨。
「紅衣優駿」暫時最叻贏三班賽，但今場以1.75馬位輕勝後，最新將評80分以上，估計將報名本月21日香港經典一哩賽並料可入選。但若想進軍今年打吡，預計此駒或要再贏一場，才有較大機會列陣打吡，且看羅富全如何部署。
第四場跑出熱頭冷腳，二至四名分別為「估惑」、「嬴風雲」及「閃電王」，四重彩派6,380元。