世界最貴後衞登場！利物浦喺日前以破後衞轉會費世界紀錄7,500萬鎊收購返嚟嘅荷蘭守將華基爾雲迪積克（VVD），喺上周五英足盃第三圈賽事首次為紅軍披甲。呢場利記迎戰同市死對頭愛華頓嘅比賽，主隊有VVD正選上陣依然有失波，但佢仍然係主角，喺完場前六分鐘建功奠勝，助紅軍以2:1險勝拖肥晉級。
法明奴疑辱罵對手
VVD今場夥拍祖爾麥迪比合作扼守中路，紅軍喺35分鐘先開紀錄，拉爾拉拿喺禁區被拉跌，極刑由占士米拿主射得手先開紀錄。完半場前發生小風波，愛華頓守將賀基迪同利記嘅羅拔圖法明奴爭波，之後推後者去場邊觀眾席，法明奴反擊衝向賀基迪狂鬧，賽後網上有自稱識睇口型嘅人，話法明奴係用葡語粗口加種族歧視語句鬧賀基迪，當時球證冇向雙方出牌，但唔排除足總會稍後算賬。
下半場踢到67分鐘，愛華頓一次快速反擊由基菲爾施古臣扳平1:1，VVD喺度都冇計要失波。到84分鐘，阿歷士張伯倫左路開角球，成班愛華頓後衞走漏晒VVD，俾佢輕鬆一頂入網，第一次為紅軍上陣就入波，助球隊以2:1贏波。
高路普大讚幫到手
紅軍領隊高路普賽後話，佢係喺比賽當日上晝先改變主意，決定畀VVD正選上陣。對於今場波佢喺賽後話：「呢95分鐘比賽並唔係我哋最高水準嘅演出，但鬥心就冇得頂，我好欣常每位球員顯示出嚟嘅鬥志。呢場係一場好困難嘅比賽，亦唔係踢漂亮足球嘅時候，愛華頓防守好出色，反擊亦有威脅，同上一次我哋喺聯賽交手時好唔同。好開心見到雲迪積克喺首場比賽就入波，好似童話故事咁，係一次出色嘅頭槌攻門，令我覺得好開心，有佢利物浦可以踢得更好。」
VVD賽後就話：「實在係好美妙嘅晚上，我哋贏波係實至名歸。可以為球隊上陣，同呢班新隊友並肩作戰嘅感覺好好，仲要入埋波，呢一球對我同家人嚟講都係非常特別。今仗絕對係夢想成真，喺晏菲路為利物浦披甲上陣係每個球員嘅夢想，入埋波就更加係錦上添花。」