周四英超獨腳戲，雖然熱刺主場只能夠逼和由莫耶斯帶領嘅韋斯咸1:1，不過總計聖誕新年快車檔期，取得三勝一和，同利物浦與及曼城一樣同奪10分(見附表)，而熱刺就以較佳嘅得失球差，成為英超聖誕新年快車檔期之王，為爭入前四壯聲勢。
靠孫興民冷箭和1:1
今場比賽熱刺佔盡優勢，其中控球率高達七成一，射門更加超過30次，可惜優勢未能轉化為入波，仲喺70分鐘畀槌仔中場奧比安離門35碼遠射得手，全隊第一個中框射門就入波。但係熱刺陣中都有唔少遠射能手，82分鐘，南韓前鋒孫興民接應拉美拿嘅傳送，離門30碼一下冷箭，收死槌仔門將阿祖安卡斯迪路，最終兩隊握手言和。賽後，孫興民都識英雄重英雄，讚奧比安嗰球比佢射得仲靚，即使洛里斯幾好身手都救唔到。但係領隊普捷天奴就對賽果顯得有啲失望，「今日球隊已經出盡九牛二虎之力去贏波，換轉平時，我哋可能已經贏咗4:1、5:1 ，可惜最後都係和波收場。但以相隔48小時就再比賽嚟講，球隊嘅表現已經值得嘉許。」
其實又難怪普捷天奴咁失望嘅，因為頭70分鐘，韋斯咸根本冇一個球員成功喺熱刺禁區掂過波。根據《BBC》嘅賽後分析，發現熱刺全隊，就只有維頓漢同達雲臣山齊士兩名後防球員企喺後半場嘅時間多過喺前場；相反，韋斯咸就11個球員都退守自己半場，由比賽第一分鐘就泊晒大巴。雖然有破壞冇建設嘅風格備受坊間抨擊，但領隊莫耶斯一於少理，表示嚟到溫布萊嘅目標就係為一分，讚賞球隊防守出色，而奧比安嘅入波更加係意外收穫。
得失球差壓紅軍藍月
熱刺慘被逼和後，𠵱家以41分排第五，落後第四嘅利物浦三分。不過齋計聖誕新年快車檔期嘅話，佢哋先贏般尼3:0、之後5:2大勝修咸頓、2:0擊敗史雲斯，到周四先和波。四場得10分，得失球差為+8，比+7嘅利物浦同曼城都稍好，成為英超快車之王。四場比賽入面，有哈利卡尼兩次上演帽子戲法，以18球領先英超射手榜、另外今季狀態飄忽嘅迪利阿里，狀態亦有所回升，加上拉美拿復出，令人腳更為充裕，就睇吓熱刺能唔能夠喺前四爭逐突圍成功。
