官員出席立法會會議接受議員提問係天公地道，不過近日官員們嘅表現就認真麻麻。繼前日運房局長陳帆缺席帳委會會議，搞到主席石禮謙嬲嬲豬，噚日民政事務局常任秘書長馮程淑儀又缺席財委會會議，惹來朱凱廸不滿而提出中止待續議案，大鬧馮程唔尊重立會。財委會主席陳健波雖然唔妥政府安排，但亦忍唔住寸民主派唔好講到咁大義凜然，如果Betty有嚟，咪一樣提中止待續議案！
立法會財委會噚日開會討論西九文化區綜合地庫第三階段工程，涉款逾31億元，朱凱廸發現常任秘書長馮程無出席財會，而提出休會。佢大鬧，官員因為放假而唔出席會議，唔可以接受，又認為即使常任秘書長唔可以出席會議，應該由更高級官員出席，斥官員唔尊重立法會。
郭家麒：當立會係ATM
公民黨郭家麒就鬧，官員係因為30幾億元太少而唔出席會議，又話政府𠵱家當立法會、財委會係自動提款機，如果局長、副局長、常任秘書長唔得閒就唔好拎上立法會，「唔見晒人，當立法會係咩嘢？」波哥今次都唔幫政府，認為當局要「派人」出席會議，但亦不忘寸民主派咪得把口大義凜然，有冇官員出現都會提中止待續議案。不過議員嬲都無用，有關議案都喺建制派護航下通過。
至於噚日朝早召開嘅特別財委會亦都火藥味濃，討論修改《會議程序》時民主黨尹兆堅發言時就大鬧，陳健波主持會議受到梁君彥影響，話喺「Leung-Kwan-yuen-lization（梁君彥化）」喎。
李八方