噚日北京正式宣佈袁國強辭任律政司司長，由鄭若驊接任，佢兩個仲孖住特首林鄭月娥一齊開記招。鄭若驊以一頭短髮示人，身穿兩件頭套裝，白色企領恤衫襯黑色荷葉領外套，掛上閃石胸針，下身就着荷葉邊黑色西裙，有網民就話鄭若驊啲衫着錯晒，暴露咗佢個肚腩，顯得個人好臃腫咁話。
形象師：剪裁花巧
我哋就問咗曾為唔少天王天后設計形象嘅星級形象設計師馬天佑（Mayao），品評吓新司長衣着。Mayao話着衫最緊要揀啱自己嘅，認為鄭喺細微處有花心思，證明好重視呢個場合，但應選擇較厚身、挺身嘅絲絨物料，會冇咁凸顯身形。佢又以林鄭為例，讚林鄭識得着直身一件過，完全睇唔出身材，建議鄭件褸做鬆啲，而剪裁亦不宜太花巧。