【本報訊】一輛七人車昨凌晨駛經香港仔黃竹坑道天橋時，撞到前面一輛空載的士，肇事司機疑心虛棄車逃去，不知去向，的士司機頸部扭傷送院治理。前港姐冠軍、無綫藝員陳庭欣（Toby）剛好駕車途經，目睹意外協助報警及安撫受傷的士司機，並呼籲不顧而去的肇事司機自首。
肇事七人車司機失蹤
昨凌晨零時30分，姓黎（64歲）男子駕駛一輛空載的士，沿香港仔黃竹坑道天橋往香港仔隧道方向慢線行駛，至業勤街附近被尾隨一輛豐田七人車猛撞車尾，的士失控打白鴿轉掉頭，七人車衝前約100米撞壆始停下。
消息稱，事後七人車司機棄車逃去，爬過路中石壆截乘對面線的士逃離現場。的士司機報稱頸部扭傷，由救護車送院治理，警方其後聯絡七人車車主了解，並追緝肇事司機下落。
陳庭欣於事發後在其Instagram表示，當時開車回家路上，「見到兩架車爛晒咁停響路邊，其中架的士被撞到逆線停咗響度」，當時警察未到場，她立刻報警。她又說，的士司機清醒但無法動彈，「我安撫咗佢，然後我走向七人車，發現沒有司機在車內，嚇咗我一跳，我諗唔係飛咗落橋底啩？」
她其後接受傳媒訪問時補充：「打三條9時，報案中心話已經有人打咗去報，但我就畀多樣資料警方，就係七人車入面冇咗個司機囉，差唔多收線時，離遠見到有警車到，跟住有兩個警察到，我講番個情況畀佢哋聽，後尾佢哋話如果我冇見到案發經過，都可以走喇，咁我咪走囉。」她續稱，事發前正駕車上橋，接近車禍現場時「都嚇了一跳，見到的士車頭面向自己，以為自己入錯線」，她希望肇事七人車司機盡快自首：「七人車司機快啲出嚟交代番成件事啦，唔可以就咁走咗去㗎嘛！」
■記者鄭文輝
