巴塞隆拿周四西班牙盃16強首回合作客切爾達，喺兩大進攻主力美斯同蘇亞雷斯都掛免戰牌下，只能先同切爾達賽和1:1。不過，呢場波幫巴塞先開紀錄嘅B隊小將荷西阿尼斯就威水，皆因呢場係佢第三次替一隊上陣，但已經累積三個入球，而且每次都係第一腳射門就搞掂；另一好消息就係季初踢咗僅三場、但養傷近四個月嘅奧士文尼迪比利，終於後備復出。
不過，西媒近日爆料，話美斯新約違約金雖高達七億歐元，但原來有秘密條款，就係一旦加泰獨立，巴塞唔再喺歐洲主流聯賽比賽，咁佢就可以免費解約離隊。至於皇家馬德里同日就作客大炒西乙嘅紐文西亞三蛋，加里夫巴利、艾斯高同馬約萊爾都有入波。
