中西區補選結果塵埃落定，民主黨伍凱欣在工黨前成員劉舒燕𠝹票下，仍以1,034票擊敗建制派嘅呂錦強。有傳媒就翻查今次選舉開支，發現僅得廿票嘅劉舒燕使咗24,606元，每選票花約1,230元，形容佢「含金量高」。點知就辣㷫劉舒燕，用英文名Olivia喺報道下留言，大鬧「你份報紙睇下幾時俾天收」，真係好猛火。
僅獲20票 每票使$1,230
劉舒燕出選以來都備受爭議，除兩度被指參選區議會時𠝹票，喺上次參與區選時一直潛水，唔接受傳媒訪問，只係選舉日票站門外「默站」拉票。劉舒燕喺留言大鬧「我花費少過團體都仲係含金量高？」隔一陣再留言「輸左仲寫𠝹票，你份報紙睇下幾時俾天收」。而留言個頭像正正係劉同個外籍男士，fb上仲聲稱佢哋已婚，估唔到佢政壇失意但情場得意喎。
翻查今次補選選舉開支，民主黨伍凱欣喺選舉工程花費52,720元，其次係呂錦強，花費最少嘅係劉舒燕，共花費24,606元；不過因為劉舒燕得票只有20票，平均每票就使咗1,230元。