律政司長袁國強噚日正式唔撈，法律界盛傳佢稍作休息「冷河期」後，就會重操故業做大律師，有傳佢會重返5年前做律政司長前做開嘅Temple Chambers，不過八方聽聞有呢間大狀樓嘅大狀，未見佢返工已驚定先，不過唔係怕袁國強「好打得」，而係怕咗佢啲煙味。
有大狀話當年同袁國強係同層做嘢，佢大煙癮係人都知，所以搞到袁國強辦公室所在嗰層樓好大煙味，有啲唔受得煙味嘅人投訴都冇用，佢話今次袁國強返嚟Temple Chambers，就好彩自己已經唔係同呢位大狀同層，唔怕受袁國強煙味影響，不過八方覺得呢位大狀唔使擔心，事關今時今日港府已實施室內全面禁煙，袁國強又做過律政司長，斷估佢唔敢知法犯法，喺自己office食煙嘅！