利物浦翼鋒穆罕默德沙拿禮拜四當選2017年非洲足球先生，呢位埃及國腳力壓紅軍隊友沙迪奧文尼得獎，至於效力德甲多蒙特嘅奧巴美揚就得第三名。沙拿今季喺各項賽事已經射入23球，而上季仲效力緊羅馬嗰時亦有15個聯賽入球，同時帶領埃及自1990年後再次踢入世界盃決賽周。沙拿攞獎後就話：「呢個獎不止屬於我，更加係屬於埃及，甚至非洲每一個細路，我希望成為埃及史上最出色嘅球員。」穆罕默德沙拿同沙迪奧文尼出席完頒獎禮後，隨即搭由利物浦安排嘅私人飛機返英國。雖然沙拿因傷肯定無得踢禮拜五對愛華頓嘅英格蘭足總盃第三圈賽事，但文尼仍可能會披甲。