新民黨南區區議員陳家珮（Judy）派嘅年曆被發現連環出錯，除咗12月有32日，仲將貴為立法會、行會雙料議員新民黨主席葉劉淑儀，貶咗做「立法會區議員」。Judy前日就立即拍片拆彈，搵嚟葉太解釋年曆係預言，話目的係為打工仔爭取假期，更加預祝葉太2019年區會選舉當選區議員。
Judy前日自知年曆卡出錯，就拍片解畫。佢首先就訪問咗幾個街坊如果有多一日想做咩，有人就話想同家人團聚、有人就話想休息。Judy仲搵埋葉太為年曆卡死撐，話呢份「神奇年曆」其實係預計，一來就預祝打工仔明年可以爭取多一日假期，二來就預祝葉太成為區議員，「寓意好，好意頭」，葉太仲話要儲多幾份喺屋企㖭。唔知呢個解釋大家收唔收貨呢？