英超聖誕新年快車禮拜三由倫敦打吡阿仙奴主場鬥車路士守尾門，槍手右翼衞比利連先輸12碼，令兵工廠冇咗領先優勢，好彩佢完場前補時階段建功，幫兵工廠戲劇性2:2逼和車仔，而今場三次單刀竟然全部炒晒嘅車仔前鋒艾華路莫拉達，亦都係另一焦點，兩隊一齊失分，最開心應該都係曼聯、利物浦同熱刺。
今場兩隊鬥攻，上半場有唔少入球機會，但全部把握唔到。直到63分鐘，阿仙奴「太子」韋舒亞左腳勁射入網開紀錄，打破個人兩年半嘅英超入球荒，上次佢喺英超入波，已經係15年五月對西布朗。不過車路士好快追平，比利連喺禁區從後踢低夏薩特輸12碼，「夏神」親自操刀67分鐘扳平1:1。
雲格又因12碼鬧球證
去到84分鐘，馬高斯阿朗素近射撞入幫車仔反先，而大舉反擊嘅槍手靠比利連補時射入靚波，將功補過逼和2:2。兩邊各得一分下，車仔以46分排第三位，落後第二位曼聯一分，同一哥曼城就差成16分，阿仙奴就以39分排第六，距離第四位嘅利物浦差五分，要爭前四踢歐聯都唔易。
槍手領隊雲格繼上場批評球證甸恩而俾英格蘭足總起訴行為不當後，今場繼續批評球證安東尼泰萊，大鬧佢咁都判12碼係荒唐！雲格表示︰「賽前我都知最後20分鐘好難捱，因為我哋賽程好不利，而我哋再一次荒唐地被判罰12碼，如果咁都吹，一場波可以吹10個類似12碼。」
莫拉達錯失三次單刀
車仔方面，其實今場有三個單刀黃金機會入波，全部落喺莫拉達腳下，但呢個西班牙國腳竟然全部唔入，頭兩次連框都射唔中，第三次出現喺阿仙奴逼和後嘅補時，莫拉達射入就絕殺，點知佢處理得好差而俾施治救出，領隊干地就話佢差啲運箒：「莫拉達喺呢段時間唔夠運，不過都要繼續努力同改進。呢個情況好可惜，因為佢有咁多入波機會，不過我都為佢嘅努力同承擔而高興。我哋𠵱家講緊一場和局，呢場係對住一支出色球隊取得嘅和波，不過總括嚟講我哋應該要贏。」
