立會補選月中接受報名，新界東嘅戰況尤其激烈。團體「創。新。香港+」噚日舉行成立典禮，宣佈創會會長李德豪（圖）有意參與新界東補選，不過李提出嘅政綱相當驚人，包括要喺新東劃出一個「城寨」，成立青年立法會主導施政，話要將香港還畀年輕人，等青年成為「城寨英雄」。
李德豪話自己參選係愚公移山，經過長時間思考，至於立場就係為本土年輕人爭取，但佢又話自己同中聯辦有聯繫，對於參選係唔係獲得支持，佢好真誠咁反問阻止人參選唔係犯法咩，但李德豪又否認自己係建制派，只係話生意在內地，難免會同省長之類有接觸，佢又話希望同本土派多啲溝通，但因為「朋友圈子太窄」，所以聯絡唔到佢哋。咁八方問佢聯絡咗咩本土派，李德豪就話自己個仔都有參與佔中，都算係本土年輕人，有同個仔溝通。至於幾時決定參選，佢就話要視乎各界反應先決定喎！