迪亞高哥斯達重返馬德里體育會之後，禮拜三終於喺西班牙盃16強首回合上演「地標」戰，結果佢喺回歸後第一場波就有波入，幫作客嘅馬體會以4:0大炒西丙嘅利達。
馬體會呢場喺33分鐘先由高甸接應隊友開出嘅罰球頂入而領先1:0，四分鐘之後，就有費蘭度托利斯接應加美路傳送射入，將領先優勢擴大到兩球。而哥斯達其實舊年九月已經由車路士轉會返馬體會，但因為球隊有轉會禁令，要等今個月解禁先可以上陣，結果佢今場後備上陣五分鐘就接應桑法蘭托里斯傳中鏟射得手，將紀錄改寫成3:0。到補時階段，利達有後衞查利斯兩黃一紅被逐，馬體會就由基沙文射入罰球埋齋，大炒對手4:0。次回合將會喺下個禮拜二喺馬體會主場進行。