香港本土議員Miss Mo毛孟靜噚日趁新年同傳媒茶敍，順手回顧過去一年議會工作。Miss Mo形容立會過去一年係多事之秋，真係日日有驚嚇，而佢最不滿係特區政府過去一年，用行政顛覆立法，用司法手段嚇窒香港社會。
Miss Mo又話，佢已確認林鄭比689更差，因為689擺明係豺狼，但林鄭就係「笑面虎」，京官「一言九鼎」實質就係一言堂，大鬧呢啲官真係對唔住香港人，Miss Mo又苦笑話，其實佢舊年喺立會入面好似睇緊《笑傲江湖》咁，尤其睇到建制派閹割議事規則，有如揮刀自宮練葵花寶典，但佢又引用《笑傲江湖》情節，話自宮嘅人最終都會失敗，佢話來年會盡做，至於下屆立法會選舉會否再戰？Miss Mo就話未決定，但就若有所指話佢好鍾意岑敖暉，莫非Miss Mo已經搵咗佢做接班人？