新民黨主席葉劉淑儀同「恩恩豬」容海恩等黨員，噚日到政總會見財政司司長，反映對財政預算案嘅意見，但大家最有興趣，都係同黨內政策總裁袁彌昌傳出緋聞後，首度現身嘅容海恩，雖然恩恩豬封口，但作為雙方「長輩」嘅葉劉，就暗示佢兩個應該真係一齊。
話新民黨桃花旺
容光煥發嘅恩恩豬噚日對緋聞繼續封口，被問到點解緋聞男友袁彌昌噚日冇到場、以及幾時嫁時，恩恩豬面都紅晒，叫記者問番袁彌昌喎。不過葉劉會後就笑住問在場記者：「點解消息咁靈通？」仲爆料話自己查探過緋聞真偽，恩恩豬當時答佢：「像霧又像花。」咁究竟容袁戀係咪真？葉劉即欲言又止，但就話自己就好開心，「梗係開心啦，我哋（新民黨）咁多喜事，成日都有人結婚嘅，喺度認識一pair pair結婚嘅，新民黨桃花旺！」
葉劉又話，近日諗番轉頭至發覺有玄機，「唔怪得我哋（容海恩）嗰次喺沙田開寫字樓，Derek（袁彌昌）都走嚟捧場！」又話自己作為袁彌昌上司，完全唔介意佢同容海恩拍拖。問到係咪佢撮合容海恩同袁彌昌，葉劉更自豪話：「我撮合咗好多對啦！」仲話覺得容海恩同袁彌昌好襯，「襯，高度都合襯啦！係高度合襯」，咁雙方見咗家長未？葉劉就話要留懸念，之後就同容海恩一齊走。
李八方