返嚟喇，全部都返嚟喇！唔止民主黨前主席劉慧卿，被DQ嘅社民連梁國雄、香港眾志羅冠聰同埋劉小麗，全部返番立會！噚日立法會政制事務委員會討論港府參照《公民權利和政治權利國際公約》提交嘅第4份報告大綱並舉行公聽會，卿姐、毛哥、阿聰、小麗等都趁機重返立會發言，唔少社運人士都有出席，例如工黨郭永健、眾志黃之鋒、雙學三子之一嘅周永康等。
廖長江叫「梁國雄議員」
噚日毛哥打頭陣發言，委員會主席廖長江叫毛哥發言時，就好順口咁講咗句「梁國雄議員」㖭！毛哥當然關注已故諾貝爾和平獎得主劉曉波同佢太太劉霞，不過廖長江唔畀毛哥帶印有劉曉波同劉霞肖像嘅紙入去開會，其後張紙仲畀保安沒收，激到毛哥即時喺場外開拖，好彩有工黨同事立即印過一張畀毛哥咋。
至於黃之鋒除咗關注DQ案，仲批評在囚人士無受到尊重，例如要踎喺地下答問題，連獨立投訴渠道都冇。而卿姐就主打法治問題，例如聯合國早喺2013年已經警告，由非司法組織嘅人大常委會釋法好有問題，會嚴重損害法治，家陣中晒喇，睇一地兩檢就知。八方心諗，如果佢哋全部都係議員，你話幾好呢。