啱啱到埗嘅新馬仔，通常都比較燥底，好易喺晨課入面唔聽話，將鞍上人拋跌後狂奔，而今朝早（4日）就有徐雨石馬房未命名、烙號B231的三歲澳洲自購新馬，接受一課1800米彈閘嘅時候，將助手拋跌後，釀成一宗走甩擾攘的事故。
呢匹三歲仔變成空馬後，跟住本身一齊拍跳嘅「勁威神童」跑之餘，仲獨自跑足兩圈都唔肯停步，後生仔果然精力旺盛。見到搞咗咁耐都捉唔到，徐雨石馬房副練（亦助理練馬師）何敬森忍唔住手，直入草地擺出一招大鵬展翅，冀將走甩咗嘅馬仔嚇窒，從而整停其步伐。
之後馬仔走多一陣，就真係停咗落嚟，工作人員即時將馬兒捉回，結果喺呢單走甩意外中，冇人同馬受傷，兩分鐘後跑道便重新展開。