冬季轉會窗設立，原意可能係為咗令球隊可以喺季中補強。但係咁多年嚟，都係藥石亂投多，成功例子少。仲有更多係上半季喺弱隊表現出色，轉個頭就俾強隊買走。如果話要一刀切取消冬季轉會窗，可能令弱隊有半季安寧，但亦同時失去賣人嘅財路；相反更打消強隊投資嘅意欲，減少投入，造成劣幣驅逐良幣。
要改變，或者可向其他運動借鏡，例如NBA。NBA轉會市場雖然冇所謂轉會費，但聯盟每支球隊都有薪酬上限，過咗上限就要畀豪華稅。你可以話有錢畀豪華稅咁咪得囉，但如果所交嘅稅項都以億計，相信都唔會有球會做咁樣嘅儍事。聯盟當中，有不少交易特例，例如傷病特例，球隊能夠證明球員因傷患，疾病等原因唔可以喺球季完結前復出，可向聯盟申請薪酬空間簽入球員替補。將呢套搬過去足球嘅話，球會季初註冊陣容裏面，如果有球員被證實因傷患或疾病，唔可以喺某個特定日期前復出，甚或因參與國家隊比賽離開，球會先至可以喺冬季轉會窗買人。呢個舉動令冬季轉會窗真正達致補強意思，更防止強隊囤積居奇。不過，任何轉會政策改變，都會得罪大量嘅既得利益者，難以執行，真可惜歐洲人不喜歡玩「一言九鼎」呢一套。
文：亨少