華將梁家俊在元旦升呢做老豆，近朝於晨課上如常到場課馬，相當勤奮，睇嚟在周日（7日）停賽復出嘅佢，會積極搵奶粉錢。
今朝（3日）早上，雖然並非主要課期，但仍一早見家俊仔到場為大摩馬房「美麗傳承」於內圈踱步，約六點後再過檔「快樂實在」在大跑道單試800米。
此匹容天鵬馬房質新馬，季內已經過三場實戰，慢熱馬狀態逐步提升，今次夥拍家俊爸爸列陣周日（7日）沙田日馬三班1600米，屬其贏馬路程，此匹今季才屬四歲的馬仔，肯定尚有進步空間，隨時可突破三班阻力更上一層樓，為馬主之一的馬德鐘及小龍女陳玉蓮，相隔超過半年後再拉頭馬，今仗不妨優先參詳。