英超20支球會早前投票通過，來季英超嘅夏季轉會窗將會係開咧前關閉，開咧後各支英超隊就唔可以再註冊新球員，目的係希望令球員們係開季後專注足球，不過冬季轉會窗就唔受影響。以筆者所見，為保證球員忠誠和球隊完整性，倒不如亦將冬季轉會窗亦直接取消吧！
相信記性好嘅球迷都會記得，去年夏天多名英超球星，包括阿歷斯山齊士、奧斯爾、菲臘比古天奴、巴克里等，都因為轉會問題一直拖延至今。好似山齊士同奧斯爾兩名阿仙奴嘅當家球星，轉會傳聞一直都未停過，全因就算夏季轉會窗結束，仍有冬季轉會窗畀佢哋諗走人，試問佢哋又點會肯為球會賣命？
所以兵工廠領隊雲格早前亦都話，現今足球太過商業化，當球隊遇到挫折或接近轉會窗，有啲球員就會諗下一個目的地，直言最理想嘅就係將轉會窗一直關閉至球季結束。筆者就對雲格嘅睇法非常贊同，畢竟球員簽咗合約就應該為球會賣命，應負起職業球員嘅責任；過往唔少球員會因為鬧轉會，缺席轉會窗內嘅比賽，直至轉會窗結束才願意為球會披甲。令球會在轉會窗期間實力大打折扣，更容易傳出好似山齊士同球員不和嘅傳聞，打擊球隊士氣。
故此倒不如取消冬季轉會窗，直接以季初組班陣容對決，一來較為公平，二來少了轉會傳聞，球員就能專注為球會拚命，為球迷奉上更精采而非「揸流攤」嘅足球呢！
文：尊嘉