周二英超曼城重上勝軌，主場3:1贏屈福特呢場比賽，傳嚟唔少喜訊，日前傳受傷怕會長唞嘅奇雲迪布尼亦火速回歸做正選；除此之外仲有西班牙中場大衛施華事隔兩場後復出擔正，仲戴住隊長臂章出戰。不過施華嘅家事似乎仲未搞掂，隨時又要暫別藍月處理私事。而藍月贏埋呢場已放離次席嘅曼聯15分，正好人月兩團圓。
史達寧閃電入波贏3:1
開波只係短短39秒，史達寧已經接應利萊辛尼嘅助攻，近門射成1:0，呢個入波亦係英超今季暫時最快嘅入波；兼英超歷來第三快入球。
翻查紀錄，原來今季英超最遲入波，亦係由史達寧射入。喺上年八月對般尼茅夫嘅比賽，史達寧補時6分35秒射入致勝一球，開啟球隊18連勝走勢。戰至13分鐘，比利時後衞基斯甸卡巴些利解圍心切，將奇雲迪布尼嘅傳中球撞入網，擺烏龍輸至0:2。
施華離隊因愛兒危殆
下半場，阿古路趁對方門將靴里奴高美斯拍出不遠，補射得手，阿古路亦射入近六次對屈福特嘅第10球，非常犀利。最後階段，屈福特憑前鋒安達格雷門前撞射入網，追成1:3較接近紀錄。
賽後，主帥哥迪奧拿對奇雲迪布尼能夠火速傷癒回歸相當高興，不過同時都好躁咁炮轟近期密集嘅賽程，表示隔兩日就比賽，簡直係謀殺球員嘅行為。
另外，佢亦有提到大衛施華嘅情況，話大衛施華呢一刻雖然歸隊，但隨時又會離開，「我哋都好開心大衛施華返嚟，但唔知道佢會返嚟幾耐，始終家人先至係每個人生命入面最重要嘅嘢。就算球隊因為佢唔喺度而勁失分都好，我都唔會逼佢歸隊，上陣與否，一切都視乎佢同屋企人嘅情況。」
早前有無稽小道消息傳出，施華回國係因發現其子非親生，而佢周三晚喺twitter表示，回國係因其兒子早產且健康欠佳，需醫療團隊協助維生，佢感激球迷嘅耐心支持。