夏神威威！車路士中場夏薩特擊敗咗英超嘅奇雲迪布尼同盧卡古，獲選為2017年「歐洲紅魔」比利時國家隊嘅最佳球員。比利時國家隊官方Twitter周二公佈由球迷投票選出嘅Devil of the Year結果，14個候選球員中夏薩特以10,280票居首，曼城嘅奇雲迪布尼獲4,710票排喺第二位，第三位係獲3,223票、效力曼聯嘅盧卡古。
至於巴西著名足球網站《Sambafoot》，亦喺周二公佈2017年Samba d'Or嘅得獎者，效力巴黎聖日耳門嘅球星尼馬，力壓利物浦嘅菲臘比古天奴同皇馬嘅馬些路，成為2017年度歐洲最佳嘅巴西球員，呢個亦係尼馬第三次獲獎，追平咗隊友堤亞高施華嘅紀錄。