有份參選民主派新東初選嘅中大學生會前會長張秀賢近日積極宣傳自己，除咗日日擺街站，亦不時喺facebook出post吸like呃like，但佢兩日前開始留意到fb專頁有異常情況，兩日間突然暴增1,000個like，笑言「Page like升得快過恒生指數」，擔心係被人惡意攻擊。
佢同八方講，自己個fb專頁每日平均有幾十個Like增長，但前日突然多300個like，噚日又增加700個，令like數突破兩萬關口，仲留意到啲like來自泰國和阿拉伯地區，相信係買like黨所為，目的係令fb以為佢買like而封鎖專頁和賬戶。
稱無意開拓阿拉伯市場
佢話正積極預備初選，暫時無意開拓阿拉伯市場，又相信唔係支持者幫佢買like，已經先發制人向fb反映呢件事。