傑志重金斟介前烏拉圭國腳科蘭加盟踢下半季同亞冠盃分組賽，有關消息周二曝光後，引嚟唔少球圈同球迷談論，傑志會長伍健噚日就話，到底係咪簽到呢位星級球員加盟，今日應該會明朗。
港超聯一哥傑志今年首次踢亞冠盃分組賽，當然唔想失禮，所以高層早已決定不惜加班費增援，今次一口氣搵夠兩個有級數外援，其中一個已見光嘅係科蘭，另一個就未定，亦都就快扑槌，因為下個星期要將名單交上亞洲足協註冊。
伍健噚日接受查詢時就話，斟科蘭仲差少少，成唔成事就要等多一日。唔少球迷擔心科蘭成年冇正式比賽，仲踢唔踢得，但伍生話38歲嘅科蘭其實呢段期間一直有保持操練，以佢「卡士」足以應付亞冠盃。
另外，東方龍獅噚日就去咗泰國備戰亞冠外同呢個月連場硬仗；如果東方喺亞冠外過到清化呢關，就會再挑韓職水原藍翼，而水原將簽已經36歲、踢過北京國安及FC首爾嘅丹恩奴域。