中環是香港名醫的集中地，在中環街頭隨時碰到名醫，到萬邦行賽馬車會吃午飯，更會與名醫碰口碰鼻，這日從陸羽走下來，在大馬路便見到兩位，左丁山向他們說：「喂，你們師弟林順潮搞眼科醫院上市，反應良佳，你哋都可以諗吓，搵多幾位老友同學夾埋，我可以介紹上市專家T與你哋認識，度掂佢。」點知名醫C冷笑一聲：「已經有同學校友搞緊啦，我兩個唔參加啫嘛！」同學校友就梗係港大醫學院同學校友啦，中環名醫有邊個唔係港大畢業㗎，其中大把係星球人、月球人。
問名醫C：「點解你唔制？」名醫C話：「做醫生搵咁多錢做乜？我哋呢班人已經有晒豪宅，有晒靚車，又有名氣，我每日見病人，為佢哋診病做手術，令佢哋恢復健康，都唔知有幾大滿足感，呢樣先至係我讀醫科嘅原始目的，更何況有滿足感之外，更有豐厚報酬，啲錢邊度使得咁多，要更多錢嚟做乜？」
醫生平日如果係有名氣嘅，病人甚多，的確係冇時間使錢，多數儲蓄儲埋大把現金，故此有好多財富管理專家向佢哋埋手，推銷理財產品，喺2009年末，一位醫生就向左丁山問計，如何走出Accumulator黑洞，因為當時佢為咗應付margin call，已經賣咗三層樓，令左丁山非常驚奇，點解醫生讀書咁叻，投資咁笨？一位未夠40歲嘅公立醫院醫生對左丁山講：「我哋班人曾經好羨慕曹貴子醫生，點解可以轉型到股市搵大錢咁巴閉，曾經視之為偶像，唔該你同我講解吓點解曹醫生會搞到宜家咁，唔見咗人？」
真不知從何說起，大概呢個世界上，無人嫌錢腥，包括星球人（每星期收入一百萬）在內，連名醫C都承認自己係手作仔，財富係揼石仔積蓄回來嘅，每小時每小時咁揼石仔，逐個病人收錢，並無捷徑。左丁山嘅家庭醫生30年來睇怕每天睇病10小時，中午幾乎冇時間坐低吃飯，每周工作五天半，如非真正敬業樂業，六十幾歲，做乜仲唔退休？現在有啲聰明人知道有辦法在一年半載之內，就可透過財技搵足過去30年行醫嘅錢，點還繼續有心機去揼石仔吖？立此心者不妨多看報紙報導關於康宏環球，曹貴子醫生及股壇長毛之「謎團」故事。上述之年輕公立醫院醫生聽左丁山講咗少少，已經話頭暈，做醫生反為簡單得多。不過佢又好醒目，識得講：「我係精神科嘅，將來或會多啲病人搵我！」