英超下季提前閂窗，Big 6冇得再好似以前咁睇辦掃貨，一開咗季就唔可以買人。而阿仙奴領隊雲格亦都提議取消冬季轉會窗，令球員可以專心一致應付下半季嘅比賽，唔會因為轉會嘅事情搞到分心。但筆者認為轉會遊戲規則點改都好，冬季轉會窗點都要保留，因為就算八月入錯貨都有機會盡快修正，喺一月物色新嘅球員補強，令到成件事都有彎轉。
好似今季利物浦咁，喺夏季轉會窗錯失咗買中堅嘅機會，上半季靠「兩嚿雲」打正選搞到成日失分，到冬季轉會窗就有機會對症下藥，買雲迪積克返嚟填補後防空缺。雖然雲迪積克未必啱用，但冬季轉會窗起碼畀咗機會利記修正，如果等到完季先至買到Mr. Right，到時一切都已經太遲，只係可以講next year is our year！
冬季轉會窗亦都係一個絕佳嘅機會，畀一啲唔受重用嘅球員重生。好似10/11球季嘅史杜列治咁，佢當年喺車路士上陣機會唔多，喺嗰年嘅冬季轉會窗就借咗去保頓。而史杜列治喺保頓亦得到一定嘅機會，英超上陣12場入咗八球，而保頓當時係英超嘅中型班，史杜列治有咁嘅成績已經算好好。睇見史杜列治咁勁，車路士之後都收番佢嚟自用，之後仲轉咗去利記同蘇亞雷斯組成咗一對強勁嘅鋒線組合。
所以話如果冇咗冬季轉會窗，史杜列治就唔會去到保頓，反而好有可能喺車仔坐板坐足一季，職業生涯從此變得不一樣。呢個轉會窗可以畀球會同球會「改過」，所以絕對有保留嘅必要!
文：聰鳴