立法會3.11補選大戰前夕，民主派首要搞好喺14日舉行嘅九西同新東初選，選出戰將喺兩區代為披甲。九龍西選情方面，被DQ嘅立法會前測量界功能組別議員姚松炎呼聲較高，暫時人氣同支持度都力壓民主黨袁海文同民協馮檢基，但姚教授未覺穩操勝券，絕對冇hea做，仲要初選當直選咁做，呢個星期起朝早同夜晚都開街站，仲要成立「山旮旯投票團」，親自帶領支持者初選日去投票，力爭九西出線權。
點解投票團命名「山旮旯」？似乎都係要凸顯無論票站喺天涯海角，佢哋都會去投票嘅決心。查實負責協調泛民初選嘅民主動力，據知會喺下周日公佈初選日票站嘅實際地點，聽聞九西會有3個，都係要靠宗教團體等組織借場。
憂建制動員搞亂檔
八方聽聞，14日初選實體投票後翌日，民主動力就會公佈結果，而16日就係補選提名期開始，唔知勝出嘅代表，會唔會搶閘就去報名？
有民主派就話，除擔心民主派支持者唔多清楚初選安排，而冇投票意欲，更加擔心建制陣營動員支持者投戰鬥力較弱嘅參選人，等正式選舉時，增加建制派勝選機會，所以必須力谷泛民粉絲投票，難怪姚松炎元旦復工後一周已經周圍走，爭取同選民接觸嘅機會，周二仲獲香港本土嘅立法會議員毛孟靜陪住開街站㖭！
李八方