大批傳媒噚日喺重新開放嘅政總東翼、即係公民廣場旁邊採訪期間，見到港台男神、《城市論壇》主持人蘇敬恆現身，仲不時同港台工作人員喺場內升旗禮台周圍行來行去，原來佢係率先「睇景」，為港台2018年首次播出嘅《城壇》做好準備，皆因《城壇》將破天荒喺公民廣場進行！
八方聽聞，港台諗過喺過去唔少社運人士企過、坐過嘅升旗禮台舉行論壇，但行政署唔批，所以《城壇》下周日會喺升旗禮台旁搭台進行，再邀請巿民入場參與，討論話題係「一元復始」。
另外，據知政府假日開放公民廣場畀巿民集會時，都會拉起政總出入口嘅鐵閘，遮咗象徵香港嘅區徽，所以《城壇》下周日進行時，只能喺象徵「一國」嘅中國國徽下進行。