俗稱公民廣場嘅政府總部東翼前地重開後，元旦遊行後就發生第一衝，更加因為有少數人留守而有歷時約4分鐘嘅清場行動，喺示威者衝到升旗禮台期間，更同保安員發生衝突，兩名保安員懷疑被推跌受傷，有一人要送院。其實娥班子當晚已經發聲明，話對衝擊事件造成有人受傷表示遺憾，反應比起回應大律師公會嘅批評迅速好多。而向來富有關愛心嘅政務司司長張建宗，噚日仲去到政府總部同保安員會面，多謝佢哋盡忠職守，以專業態度協助維持政府總部秩序，同時又就兩位保安員喺日前執行職務時受傷表達關注，向佢哋致以誠摯慰問，祝佢哋早日康復。