一直行事低調嘅民主黨創黨主席馬丁李柱銘囝囝李祖詒（Joseph），最近因為加入咗資深大律師林定國支莊，參選1月18日嘅大律師公會改選，不時喺報章新聞中出現。雖然同民主之父老竇唱對台，但無損佢哋兩仔爺感情，聽聞Joseph嚟緊仲有件事𠱁得老竇好開心，就係佢6月會同女朋友拉埋天窗，就嚟飲新抱茶榮升老爺嘅馬丁回應時都喜孜孜，仲以打官司形容自己心情！
唔畀壓力催抱孫
其實李家對呢單喜事好低調，但已經開始喺法律界流傳。聽聞Joseph嘅未來太太屬名門之後，係上巿公司老闆女，父母更曾喺《歡樂滿東華》現過身，係城中名人。幾經明查暗訪，八方收到料，李祖詒嘅未婚妻原來係莎莎老闆郭少明細女郭詩雅，「馬莎」稍後做親家。
八方打電話畀Joseph至今未獲回覆，咁佢老竇馬丁又點睇？馬丁不禁笑住話，聽到囝囝即將結婚嘅消息，心情就好似打官司，「第1件案輸咗，第2件案又輸咗，等到第9件案都輸埋，原本去到第10件案，都冇乜希望會勝出，點知突然贏咗，就係咁嘅心情！」即係咩心情？資深大狀講嘢，普羅市民點會咁易就明！
問到會唔會希望囝囝盡快開枝散葉，喺香港落實真．普選之前，先嚟次真．抱孫？馬丁笑住話，唔想畀壓力囝囝，所以不予置評！
李八方