禮拜一烏拉圭記者Sergio Gorzy爆料，話38歲嘅烏拉圭傳奇射手科蘭，即將登陸港超聯！本報記者查詢，將代表香港參戰亞冠盃嘅傑志就承認斟介緊科蘭，如果簽約就會踢到五月季尾。之前科蘭受訪，就自己話過2015/16球季回歸烏拉圭勁旅彭拿路之前，曾經拒絕過香港同美國球會嘅邀請。
38歲嘅科蘭2016年已經掛靴，最後一間效力球會係印度超嘅孟買城，上陣12場入五球，佢2014年亦都試過喺大阪櫻花落班，早有喺亞洲作賽嘅經驗。傑志方面回覆本報查問就承認的確斟介緊科蘭，但就冇講成事機會喇！
南非世盃成國家英雄
科蘭喺2002至04年曾經效力曼聯，其間踢得麻麻，不過佢之後去到西甲爆Seed，喺維拉利爾同馬德里體育會越戰越勇，2005同09年更加兩度贏得歐洲金靴獎。科蘭更加係烏拉圭足球代表人物，作為烏拉圭喺2010南非世盃拎到第四名嘅功臣，佢以五個入球，同湯馬士梅拿、韋拿及史奈達並列入球最多，當中對南非同荷蘭嘅遠射，同埋八強鬥加納嘅罰球，都係嗰屆嘅精采入球。科蘭累積喺2002至14年代表國家隊踢咗112場入36球，一度係烏拉圭國家隊歷來入球王，不過𠵱家已經俾哨牙蘇取代喇。
東方簽井川祐輔
講番港超聯，自從南華喺2010-11球季簽入畢特加基士文嘅「畢基組合」之後，傑志喺2016年簽入前漢堡嘅香港、德國混血兒兼曾經踢過德國U20嘅中場林志堅，已經算係轟動一時，如果今次傑志真係簽得成科蘭，港超聯又可以受到世界傳媒嘅注意喇！而傑志喺亞冠盃被編入E組，暫時只得全北汽車一隊，另外兩支對手就要踢埋附加賽先知。
本地另一支老牌球會東方龍獅亦決定增兵踢亞冠外；據日本傳媒報道，東方亦搵咗踢過日聯名古屋鯨魚同川崎前鋒嘅中堅井川祐輔，而井川上星期嚟咗香港睇東方喺港超對夢想FC同東方傾合約細節，不過，東方大軍今日拉隊去泰國集訓，唔知井川會唔會喺當地歸隊呢。