參加過立法會選舉出戰資訊科技界嘅楊全盛Eric，原來最近做埋香港電競總會會長，明言要將電競推到上奧運，仲有間專玩VR（虛擬實景）嘅遊戲店即將喺尖沙嘴開張。
暫時電競運動頂盡只係上到亞運項目，距離成為奧運項目仲有好長嘅路要行。Eric當然唔係孤軍作戰，事關佢嘅老友霍啟剛早幾個月做咗亞洲電競協會會長，𠵱家Eric又做埋電競總會會長，相信兩兄弟拍住上，可以相得益彰。
而佢嘅VR體驗店座落尖沙嘴，據知店內會有6款遊戲畀人玩，仲要係坊間少見、可以多人連線嘅VR遊戲，類型包括第一身射擊、冒險、動作等，例如有隻遊戲係可以8個人同時玩嘅恐怖遊戲。為咗搞呢個VR體驗館，Eric話做足功課，睇晒相關法例，結論係香港嘅法例都幾過時囉！