球壇經常有球員虛報年齡事件發生，近年就有唔少非洲球員被質疑佢哋特登報細數，好似三年前拉素由喀麥隆買返嚟嘅17歲小將明拿拉，個樣成40幾歲咁款，有非洲足球網站就曾經爆料話佢實際已經42歲，成為一時佳話。最近，喺巴黎聖日耳門（PSG）U12隊內，亦出現呢種有球員報細數嘅質疑。
畀人質疑嘅呢位細路叫艾查戴利（Bitshiabu El Chadaille），司職後衛，被質疑嘅原因，係因為佢生得太高，高達1.82米，即係成六尺幾，比起同齡細路高成截。呢隊PSG U12早前去西班牙踢系列賽，結果被包括馬德里體育會在內嘅西甲球會質疑，但PSG堅稱佢真係2005年出生，而且佢同PSG簽約時有張相，12嘅佢真係同隔離啲阿叔一樣高。
人生得高冇罪嘅，起碼艾查戴利望落去仲係似一個12歲嘅細路，唔似係報細數。其實，曼聯球星盧卡古細個亦被質疑過，話佢大隻過同齡嘅細路，令盧卡古阿媽經常要攞出世紙，證明冇虛報年齡。