星期日本欄提過大富豪郭鶴年出版自傳，三聯書店剛好有發售，上星期五在陸羽午飯後，就走去買番一本。此日去陸羽居然有白酒一杯贈飲，係曾俊華先生太太送過嚟嘅，兩位好似與家人一齊吃午飯，不便打擾，只係舉手致意就算，豈料莊曾如此客氣也。同枱飯腳亦話：「曾財爺睇嚟氣色唔錯，無官一身輕，自由自在，可享受閒情生活，起碼可以嚟陸羽飲吓茶先。」做高官都可以嚟嘅啫，1997前彭定康就久唔久到陸羽三樓，同我地一齊行樓梯啦。
無官一身輕就真係夠輕鬆，飲白酒之時，我地正在討論大律師公會針對人大拍板之一地兩檢方案，嚴厲批評，餐飲M話：「假如當日薯片叔叔竟然選贏咗，今日受批評嘅就會係佢，邊個做特首都要硬食一棍嘅嘞。」習近平既然話咗中央對香港有全面管治權，全面喎，故此李飛話：「人大一言九鼎」，以後凡有大事，香港人必然照樣要硬食。
離開陸羽，急急腳行去三聯，「郭鶴年自傳」擺在當眼處，售價148元。此書由郭鶴年口述，Andrew Tanzer編著。原文應該係英文，但三聯冇英文版本出售，呢位編者係前遠東經濟評論記者及福布斯作者，哥倫比亞大學新聞學碩士，具CFA資格，現時係紐約一間財富管理公司高級研究員，既識新聞又識財經，好有資格編寫郭鶴年自傳啫。
郭鶴年對於家族與共產黨之關係，並不忌諱，第四章寫二哥郭鶴齡，既尊敬又感傷，幾動人。二哥博覽群書，13歲已讀希臘、德國、法國、俄國與英國之哲學巨著，由此而對政治發生興趣，思想獨立，愛護母親，不忿父親的「黑暗一面」，在學校是優等生，經常投稿到海峽時報討論法西斯主義與殖民主義，大膽指出希特拉與英法殖民主義並無不同，後因不向校長威權屈服，被趕出校門，1945、46年之間加入馬來亞共產黨（馬共），後成為馬共宣傳負責人，受英國軍追捕，馬共逃入森林打游擊，於1953年被英軍槍殺，31歲便英年早逝。郭鶴年自言二哥對他一生影響極大，書中盡見郭鶴年對英國殖民政府的鄙視，但郭父則不斷與英國人做生意，成為英軍的糧食供應商，郭鶴年負責管倉，之後郭家財富逐漸積累起來，擴充至貿易、航運、商品、地產、酒店，因郭鶴齡的關係，而馬共與中共有不可言喻的往來，郭家發跡後，開始發展中國貿易，中國投資，得中央領導人關注，那份源遠流長的關係，是其他華人商家無法在北京重演的。