2018年第一日已經有唔少比賽上演，打頭陣嘅係日本天皇盃決賽，大阪櫻花喺琦玉球場對橫濱水手，結果櫻花喺先失波下，踢到加時以2:1反勝，贏到2018年日本球壇第一個錦標（圖）。水手就慘慘豬，失冠之餘，亦宣告無緣參加來屆亞冠盃。
呢場波除咗爭錦標之外，對水手相對更加重要，因為一定要贏到先有資格出戰來屆亞冠盃賽事；對於喺上季日聯獲季軍嘅櫻花嚟講，屈居日皇盃亞軍嘅話都只係由直接躋身亞冠分組賽，變成要出戰附加賽。
水手加時輸波失亞冠
場波亦一如所料難分難解，前鋒伊藤翔喺開賽八分鐘就為水手先開紀錄，櫻花就喺65分鐘由山村和也建功逼和，法定時間賽和1:1。進入加時大阪櫻花反超前，水沼宏太喺加時上半場五分鐘射入奠勝一球，帶領櫻花以2:1反勝水手。由於日皇盃亞軍冇亞冠盃資格，水手下季無緣出戰亞冠，就益咗聯賽第四名嘅柏雷素爾，冷手執個熱煎堆，頂上參加來屆亞冠附加賽。