2017有名你叫，乜都關個「7」事，乜「7」都關個你事。為何林鄭「777」票當選特首？是上帝意思？是阿爺「柯打」？還是中Jackpot？若說彌補上手「689」欠「7」用，今鋪開番三條七別具劃時代意義，但執拾對方爛攤子和爛班子，又未免太過不幸了。
單是標準工時問題，已拖到2046，港人最關注、劏房波最寢食難安的房屋問題，也始終未解決。同你Fact Check，本港貧窮人口衝破135萬，堅尼系數屢創新高，堅「離」地數幾何攀升。有人連花之戀也買不起同時，卻有人排隊炒海之戀，有樓有高潮嘛，樓市高潮浪接浪，顯徑公屋要五百萬，西營盤二百呎劏房叫價過千萬。港人炒得興起，iPhone已out out哋，炒股炒騰訊炒bitcoin做礦工先王道，有閱文冇窮人。
港式炒風蔓延至企業，匯豐、國泰陪你炒埋一份，IT永遠首當其衝。我認我姓屈，今年這麼多航空事故，也不能說無因。大家可有發覺，今年海陸空都相繼出事：電車出軌、巴士翻側、貨船撞島，地鐵不是犯火險便被水淹，不然就是跪低無限次。港人跪低由細學起，跪回家不再是叻哥專利，激嬲女友？跪。唔夠單？跪。得罪阿頭就惟有跪住「Sorry Sir」囉。所以，甚麼一地兩檢呀、港珠澳超支呀，港人也跪住嚟硬食。個個都硬食，唔通個個都想硬食咩？巴西黑心肉我哋食唔少，冤獄同警棍就決不能忍。還好，這年頭還有惡有惡報，朱生要在獄中過生日，相信是今年聖誕聽過最動聽的佳音。
潮流興#metoo，若套用在校園欺凌，相信也有不少受害者。小學生被插眼、中學生被掟凳、大學生被滴蠟被下體扑頭，不過HKU校長都劈炮唔理了，哪似得興德前校長咁關心學生，哪管是影子學生？不要怪港人唔信陳氏，政府宣傳片有講，騙徒手法層出不窮嘛，甚麼牽強大話都說得出：摸屁股係give me five；拋胸就話去日本拍AV；尼姑可以穿金戴銀假結婚；跟降頭師性交可以轉運；英國執塊樹葉咋啩，都吹到自己執過業，又難怪殺無赦都夾硬話係嫉惡如仇咁解。然而，世事真的無奇不有，Lan線可以用來自殺，在差館裏；載有選委資料的電腦可以失竊，在特首選舉後備場地；連李偲嫣都找到真愛，我想，林子健事件也不算太匪夷所思吧。
九七回歸二十周年，乜七都共融了。大媽來港學傳銷，乞衣來港學行乞，只差在未用得支付寶過數，支付寶有乜好處？有請雷鼎鳴教授講兩句。祖國咁好帶挈，林鄭當然感受到「底氣所在」，套譚耀宗一句，「I think I…I…I very much thank you」囉。實情係你我都知，強國只是不停挑戰消防員器量、長洲居民忍耐、和綠海龜生命力。風水原來真係會輪流轉，這邊廂樂視香港清盤，那邊廂亞視回魂，這不就是so-called香港精神嗎？
We are Hong Kong，今年我們有世界拳王，有足球小將，有金馬影后，又有貼中三串七的馬神曾志偉，只差在未貼中林鄭三條七啫。那麼777其實代表甚麼？第一個「7」，是公正處理七警事件；第二個「7」，是解決荃灣漆水問題；第三個「7」，就是爭取七仔賣廁紙囉。邊個七都搞唔掂，就不如三七廿一執包袱走人算數。
如果咁都唔明，我就無計了。
撰文：杜秋棠@抽水站
https://www.fb.com/freakingwestlook