Happy New Year！踏入2018年，又係時候重整自己再出發，無論是快樂與難受，也只不過剎那感受，新年伊始都係時候make a wish，幾位喺2017年都有新狀態嘅政界中人，各有各嘅新年願望，具體細節雖然不盡相同，但方向肯定一致，就係希望市民以至身處其中嘅香港，今年好過舊年！
恩恩豬想幫後生仔降火
My friend，今天你如何？輔仁媒體主編容樂其同新民黨立法會議員容海恩，2017年因為喺facebook chat過而成為好友，恩恩豬早前開辦事處，容樂其都有去捧場，證明兩人友誼開始想好似萬里長城咁長。
咁恩恩豬新一年又希唔希望識喺網上世界識多幾個新朋友？佢話喎，成日都識新朋友㗎啦，似乎唔使以呢個做目標，而佢向來都少談私事，嚟緊一年都係想專注多啲議會工作，希望政府多啲民生措施出台，等多啲市民可以受惠，尤其要解決年輕人嘅怨氣。向來愛打機嘅佢更希望香港政府可以牽頭成立電競總會，以便有團隊可以代表香港出賽，覺得呢個都係推動年輕人向上流動嘅方法！
卿姐盼普選Delay No More
去年對卸任立法會議員嘅前民主黨主席劉慧卿，相信輕鬆好多，例如唔使喺議會打反修訂《議事規則》拉布戰， 慳番好多時間。選過立法局同立法會7次、次次都贏嘅卿姐，離開議會後就周遊列國，過住啲好似閒雲野鶴嘅生活，只係最近有一次旅程令到佢有少少困擾。
八方最近見到卿姐，就問佢新年願望係咪包括普選同航班一樣「Delay No More」？點知一講就即刻俾卿姐訓示話：唔准講粗口！又唔使咁敏感，卿姐息怒呀！佢諗咗陣就話，民主普選快啲嚟到，當然係佢願望，佢同時好希望北京可以尊重香港人，八方相信呢個都係港人嘅共同願望，中南海嘅「袞袞諸公」，聽到未？
村長籲港人仗義執言不屈不撓
2018年對社民連副主席黃浩銘嚟講，相信會係相當深刻嘅一年，一來村長今年就滿30歲，同時亦係佢加入社民連嘅第10個年頭，二來係阿銘仲有多宗官司在身，而佢喺啱啱過去嘅2017年，就因為東北案入獄13個月，同女友嘅婚期要無奈延後，暫時未再另擇吉日。
八方問佢有乜嘢新年願望，會唔會都係關乎兒女情愛事？鐵漢係有柔情一面，但最關心嘅似乎都係香港大事。對於普羅港人同政治犯，阿銘分別留下8字心願，佢最希望香港人「仗義執言，不屈不撓」，至於政治犯，就必須「堅毅奮鬥，無畏無懼」。提醒港人要發聲之餘，都不忘鼓勵戰友兼以此自勉噃。
岳少冀泛民補選全取六席
成個老襯，從此被困。去年對公民黨黨魁楊岳橋（AY）嚟講，梗係特別啦，事關呢一邊嘅月娥以777姿態上場，另一邊嘅「娥頸橋之戀」正式落幕，皆因AY同女友、即係家陣嘅楊太拉埋天窗，告別單身生涯！
咁，2018年嘅願望，會唔會係生番幾個？係就係想要番幾個，但唔係講緊年生貴子，而係重奪議席。AY明言新年願望係民主派全取6席，除咗希望3.11補選嘅九西、新東同港島區直選，以及功能組別嘅建測界由民主派攞番，若九西同新東另一議席空缺有補選，同樣唔好俾建制派搶奪。佢話大家如果對人大常委嘅無理好憤怒，呢個就係最文明嘅方式，對專橫政權展示不滿兼表達控訴！
李八方