於相熟食店買外賣，要水餃一打，俾人捉住問貼士：「一片光明有冇機會贏？」吓，點講呀。一片光明在一月一日出賽跑一千四百米（第十一場1號），馬仔細細，要負頂磅133磅，機會當然大打折扣，騎師羅理雅今季表現好好，排第3檔，睇佢點樣執生啦，論對手當然係比上兩次跑三級賽與一班賽弱一啲，但同時亦有一啲自購高價打吡馬上陣，唔知佢地是龍還是鳳，所以真係好難講一片光明有冇機會，唔怪得好多份馬經嘅專家都唔睇好。
講到馬經，星期四（十二月二十八日）就出排位版，為咗爭奪銷路，各馬經排位版在上午稍後及下午三時前已經出齊，在中環報攤有售，可見寫馬經之人真係分秒必爭，完全無稍為鬆懈時刻，印刷廠及發行亦要充份配合至得。左丁山知道一片光明出賽，梗係及早去買排位版啦，馬經有好多份，不少已存在幾十年，左丁山未入學讀小一已經有㗎啦，現在年紀大咗，知道有啲評馬人前輩其實已經老早退休或仙遊，但佢地份馬經依然繼續出版，想必係後人繼承之故。市場學有一個概念，叫做brand loyalty，上堂教書講呢個概念嘅話，搵馬經做例子就最適合。
左丁山通常買幾份馬經馬簿排位版，在閣麟街大馬路交界報攤，話要買「超班」馬簿，睇檔阿嬸話冇。左丁山驚佢聽唔到，加多一句：「超班馬簿呀！」阿嬸即刻話：「未聽過，都唔知你講乜。」左丁山無趣而去，先知道呢本今年九月新出版嘅馬簿原來在中環幾個報攤都唔賣，呢位阿嬸仲講到「唔知你講乜」㖭，可見新名字馬經進入市場之難。反之，有五、六十年歷史嘅「老五」、「天皇」、「虎眼」、「冷門」等等就到處都有，反而同年代出現嘅報紙「越華」、「超然」、「紅綠」、「真欄」早已湮沒無聞，此外老牌「大勝」馬簿出售股權之後，報攤上又出現另一本「大勝」（太陽），令好多人分唔到邊本係新，邊本係老，左丁山如果唔係向余伯樂查詢，也不知其分別。總之在馬經市場，brand loyalty十分緊要，老馬經即使換晒新人執政，名字一定要舊！
講番今日賽馬，打開「大贏」馬簿，赫然發現，第一場13號勇晉神駒，第五場1號三思飛駒，第十一場1號一片光明，馬主全是新亞校友，有理無理，今日一定買番一條新亞校友獨贏位置混合過關，輸咗就當捐錢做善事啦。