趁住聖誕同新年有連續假期，唔少政界中人都外遊唞一唞。好似實政圓桌立法會議員田北辰咁，去年除咗議會同地區工作，又要忙住喺人大選舉爭冧莊，結果喺唔少建制派暗暗杯葛下，以比上屆更佳成績連任，為自己爭番啖氣。打完一場大仗，亦係時候放鬆唞唞氣，田二少呢個假期就同家人飛咗去新西蘭，共享天倫樂。新西蘭以好味車厘子著名，仲有號稱全球最大嘅車厘子，田二少途上就有幸遇到，仲同孫女去咗果園以爺孫檔採摘，摘完一袋袋滿滿嘅，相當happy。
田二少話喎，佢一直相當支持漁農界，好想知道呢種全球最大嘅車厘子喺香港種唔種到？但八方更想知道，唔知漁農界選委喺啱啱過咗嘅人大選舉中，有冇支持田二少呢？