立法會3.11補選，民主派喺新東嘅競爭激烈，工黨郭永健有唔少主流民主派政黨力撐，新同盟范國威有一批地區樁腳支持，而學聯前常委張秀賢似乎可以吸納部份本土派，但同另外兩位對手比，號召力都係差咗少少。噚日終於有王牌登場為佢造勢，銅鑼灣書店創辦人林榮基同佔中醫療隊召集人歐耀佳醫生，親身去到張秀賢嘅大圍街站支持。
林榮基話撐張秀賢係因為佢嘅政綱好詳盡，對香港目前面對嘅問題清楚了解，甚至比老一輩更熟悉，而香港未來要依賴新一代作改變，睇唔到其他新東參選人有呢個特質。歐耀佳就話，無論佔中或反國教期間，都見到年輕人對真理嘅追求，覺得年輕人嘅熱誠可打動社會。