呢日中午冇約會，冇訂位食飯，當然唔同人去逼，等到一點半之後，先至落樓覓食，諗住午飯人群已逐漸散去，到餐廳搵位會比較容易。點知行到砵典乍街越南牛肉河粉店門口，只見到烏燈黑火，唔通突然間執咗？睇真啲，唔係噃，呢間食店係關上大門，但門上掛上紙牌寫住：Chritsmas Holidays，closed from Dec24 - Jan2。唔少人話餐飲生意難做，租金貴，人工高，賺錢難喎，偏偏呢間越南河粉店就叻到一年放兩次假，一次係掛上Summer Break紙牌，呢次就係Christmas Holidays，香港都唔知有冇第二間餐廳有如此假期安排，佢平時仲有星期日休息嘅呢。
冇牛肉河粉食，就去食有所謂「香港仔」風味嘅魚蛋粉，隔一條街啫，好快就到。途中行過萬宜大廈，咦，曾被匪徒爆竊嘅二手貨（手袋為主）名店Guiltless已經關門，唔係聖誕假期休息喎，而係真係封舖，有搬運工人搬貨走，大概係短期租約期滿，屬一啲Pop-up Shop性質，滿約即走嗰款。左丁山孤陋寡聞，如果唔係睇「蘋果日報」報道過嗰單爆竊新聞，都唔知道佢嘅老闆就係大富豪郭鶴年之千金郭小姐。郭小姐好似幾年輕噃，曾經覺得奇怪郭千金年齡好似與父親相距甚遠。前幾日睇星島日報講「郭鶴年自傳」出版，先至知道原因，就係郭鶴年在1979年移居香港，同時因為愛上一位何寶蓮女士，與太太分居而不離婚，何氏後來誕下三名子女，故此郭氏子女有大有細。
郭鶴年乃東南亞傳奇人物，富甲一方，在馬來西亞發跡，在星加坡揚名，1970年代中趁尖東開發，與信和黃庭方家族一同來港在尖東競投地皮，奠下香港地產事業基礎，黃家與郭家係星加坡過江龍來港開拓事業成功嘅典範，與永泰鄭家鼎足而三，同是港星兩地皆是享有盛名嘅家族企業。華人大富豪極少出自傳，要去買番本郭鶴年傳睇吓至得，如果內容有提及郭鶴年父親、兄長與共產黨有無關係，為何周恩來會搵過郭氏企業為中國在國際市場買糖運回中國等等內幕，咁就認真精彩咯。1989年六四之後，郭家無畏無懼，繼續在北京興建國貿中心，唔似得其他財團全部採取觀望態度，當中應該係有啲深層次認識嘅！