上周六意甲早場，啱啱上周中意大利盃先加時淘汰死敵國際米蘭嘅AC米蘭，作客憑後備上陣嘅查漢奴古門前執雞，1:1逼和費倫天拿，總算喺聯賽都止一止血，結束兩連敗。
查漢奴古執雞成功和1:1
自從加度素領軍後，畀人覺得仲衰過蒙迪拿之前帶隊嗰期，仲傳佢因為唔滿意球員冇鬥心，曾諗過閃電辭職，而球會亦想搵番蒙迪拿重掌帥印，但隨住後者已成為西維爾新帥，AC都叠埋心水唔好諗咁多。
上周六對費倫場波，佢哋雖然唔見踢得好好，仲要踢到71分鐘先失一球，被馬體會教練施蒙尼嘅囝囝基奧雲尼施蒙尼接應左路傳中頭槌攻破大門，但三分鐘後，入替波連尼嘅查漢奴古，就藉對方門將史樸迪路撲出蘇索右路突如其來嘅遠射後甩手，門前執雞成功，最終場波就以1:1完結，亦令加度素暫時可紓緩一下。值得一提，周中因傷缺席意盃嘅AC門將基安盧基當拿隆馬，雖有傳一月走人，但呢場仍然復出正選把關。
拿玻里成半程冠軍
另外，拿玻里上周五作客克羅托內就贏1:0，由咸錫再度做功臣建功。佢上輪戰勝森多利亞，已經為拿玻里射入個人第116球，打破咗馬勒當拿保持115球嘅隊史紀錄，所以球隊特別喺對克羅托內場波着住有咸錫頭像同寫上「17號拿玻里隊史神射手」臂章嘅球衣出賽，結果佢不負所託，喺比賽第17分鐘冷靜射入個人第117球，協助球隊小勝。全取三分後，拿玻里目前以19戰得48分續居意甲榜首，以意甲半程冠軍身份度過2017年。