今年嘅韓娛圈算比較平靜，能夠成為年度風頭躉嘅韓星，相信得宋仲基、宋慧喬呢一對新人。雙宋因為拍攝神劇《太陽的後裔》撻着，喺10月31號舉行咗世紀婚禮，當日成為全亞洲新聞焦點！另外，今年宋仲基走咗去拍戲，佢有份主演嘅《軍艦島》大熱，喺香港票房仲成功收過千萬，可謂雙喜臨門。
同雙宋一樣，踏入人生另一階段嘅韓星仲有Rain，佢喺年頭低調娶金泰希；退出《Running Man》嘅Gary喺4月秘娶圈外女友，上月做埋老竇；神話Eric喺7月娶女演員羅惠美；仲有BigBang太陽今個月宣佈，出年2月3日娶拍拖4年嘅閔孝琳。而未到結婚階段，轉為拖友嘅有柳俊烈同惠利，喺8月被爆拍拖。
不過有啲戀情就捱唔過今年，好似今個月玄彬同姜素拉宣佈分手；上個月李敏鎬同秀智都結束近三年嘅戀情；1月認拍拖玩姊弟戀嘅周元同BoA都分開；仲有李準基同全慧彬、南柱赫同李聖經呢兩對，喺今年4月被爆拍拖，8月就嗌分手。
韓國樂壇方面，都有兩個大勢女團「分手」，4人組合SISTAR喺6月正式解散，有報道指孝琳同昭宥做solo歌手，寶拉同多順就專心做演員；而8人組合少女時代就因為成員秀英、Tiffany同徐玄都唔續約，可謂名存實亡。
今年又有唔少OPPA選擇入伍，2月有JYJ嘅金俊秀、BigBang嘅T.O.P；3月有帝國之子嘅光熙；5月有李敏鎬、周元、Super Junior圭賢；8月有池昌旭；9月有2PM嘅玉澤；就連金秀賢都喺10月入伍。
嚟到年尾，韓娛圈先後痛失演員金柱赫和男團SHINee成員鐘鉉，前者因車禍喪命，後者疑燒炭自殺，令人惋惜不已！
更多娛聞，喺晒《娛果》
http://fb.com/appledailyent