美國喺禮拜五有一個男人玩單車嘗試飛過欄杆嘅影片喺網上爆紅，個男人喺單車場嘗試用後空翻嘅方式飛過單車公園嘅圍欄，但係似乎失手，架單車插咗喺一排欄杆上面，個男人竟然無穿無爛，完全無受傷。
影片出現之後，有人認為佢係死好命，應該要去還神、或者去賭場玩兩手；有網民就鬧個公園點解會有咁危險嘅設計；有人就正義之士上身，話當事人根本唔應該上載呢條片，認為會教壞細路。亦都有網民「柯南」上身，係咁提出理據去證明呢個係經過精心設計嘅動作，當中嘅論點包括1）個男人幾乎因為意外俾欄杆插死，但兩個角度揸機嘅攝影師仲係好冷靜，連郁都無郁過、2）有人一口咬定係假嘅，因為呢個男人嘅身份並唔係咁簡單、3）亦有人就咁話段片係整出嚟嘅等等。
其實呢個男人係尼波尼坦（Anthony Napolitan），係一位職業BMX運動員，一向都有玩開花式單車，甚至出席紅牛嘅極限運動等活動。尼波尼坦喺自己嘅Facebook就話自己係好彩，網民一般都係話佢好彩，亦有人話自己朋友20年前試過同一樣嘢，但下場同呢次完全唔同，雙手手腕都俾欄杆拮穿。
到底呢位職業BMX運動員今次真係咁好彩？定呢一切都係經過精心計算同舖排嘅結果？相信只係得尼波尼坦，同現場幫佢影呢段片嘅人會有答案。