【2017大事回顧】
薯片雖則係好食，但食得多會熱氣生暗瘡，但今年唔少香港人，似乎唔介意燥熱，瘋狂愛上薯片，直情唔使食呀，就咁離遠望吓咋，就似乎有望梅止渴嘅神效咁嘞！唔係咩？明明特首小圈子選舉，得嗰1,200人有份選，普羅大眾冇票喺手，但坊間全力支持前財爺曾俊華，儘管只係喺場外睇住呢場選戰，都好肉緊咁為佢打氣（圖），全情投入薯片鬥月娥大戰，手持300張票嘅民主派更厲害，瞓身支持建制派嘅薯片叔，可見佢嘅魅力沒法擋！
相信大家都估唔到，呢片薯片旋風，由年頭帶到落年尾。3.26特首選戰後，薯片行情仍然看漲，大家食過翻尋味，冀望佢可以同田大少、曾鈺成組成「JT黨」，繼續為大家帶來開胃嘅精神食糧，可惜JT黨胎死腹中，令一眾薯粉大失所望，好在呢，薯片叔冇收埋自己，反而喺年底到電台做節目，仲要因為主持節目惹嚟娥特辦狙擊。唔知市民對薯片嘅熱愛，明年會唔會減退呢？