聖誕節日，收到數唔晒咁多「聖誕快樂」電子短訊與GIF，幾難一一全部睇完。早前內地官媒宣傳中共禁止黨員慶祝聖誕，視聖誕節為十九世紀洋人侵略中國時帶來之西方節日，係中國之恥辱，中國人應視聖誕節為恥辱節，不可慶祝。
咁講法，好似係清朝義和團再生，在那一方面符合習近平之19大精神呀？如以後再有甚麼中央宣講團應我哋女特首林鄭月娥之邀，來港宣講甚麼中央政策精神，唔知民政事務局局長劉江華敢唔敢舉手發問：「在中國城市慶祝聖誕節，放假兩天，是否違背國策？」國策即黨策，唔使畫公仔畫出腸啦。
放假前遇到來自廣州嘅財經C，醒目仔也，內地大學畢業，來港讀埋碩士，咁就可以在港打工，得閒返廣州見父母當放假，唔知幾爽。左丁山問佢：「喂，共產黨員唔准慶祝聖誕，點解你同班老友有咁多聖誕節目？」財經C大笑：「我唔係黨員，邊理得咁多，廣州有聖誕節目呀！」果其不然，去咗外地過聖誕嘅老友P傳來一則短片，係五星酒店大堂內之報佳音錄影，一班青少年學生唱We Wish You A Merry Christmas，英文發音與香港學生冇分別，與聖誕前夕平安夜在沙田馬會二樓香港青少年唱同一首歌，大致相同。酒店大堂氣氛幾好，於是問番老友P：「邊間酒店呀？」老友P即刻回覆：「你未必估到，廣州IFC嘅四季酒店呀！」哦，唔怪得財經C話廣州有得玩，黨策未必人人跟隨。
一小時後，經常北上玩樂嘅老友G又傳來畫面，係內地某機關外牆熒幕上之文宣：「根據上級規定，任何機關事業單位，黨員幹部，大中小學生不得參與『萬聖節』『聖誕節』等各類『洋節』的慶祝活動。」
政策真係寫得好明白噃，凡「洋節」都唔玩得，非黨員人民以後咪一樣有顧忌？高級豪華酒店如廣州四季等等，分分鐘做少好多應節生意，香港或者有機可乘，充分發揮一國兩制優勢，大力宣傳香港係洋節玩樂之都，吸引內地遊客來港玩轉萬聖節，年尾來港歡樂一星期，過一個吃喝玩樂之聖誕與新年。旅發局敢唔敢在內地大力宣傳來港過洋節呀？諗深一層，1949年，新年元旦，八一建軍節，十一國慶節等皆與耶穌日曆有關，中國用耶穌有關嘅日曆，仲唔係恥辱，中國共產黨如果唔用番丁酉年壬子月庚寅日（即今天），索性就以馬克思元年開始計日子啦！