重開公民廣場，但唔批准市民集會，只益建制派與額頭鑿住愛字的社團。公民廣場重開第一炮，唔使審，必然是目前西環碼頭的翻版，不理社區聲音，一言堂，判俾乜春神神佛佛癲癲喪喪團體包場做大戲，蛇齋餅糭當ICAC死嘅收買街坊。接下來，公民廣場重開就用來做苗圃，新政府連公廁有冇廁紙都要「關注」，逼市民多菜少肉是必然嘛。嗱，睇吓幾咁民主，真係可以公開跟邀請議員去禮賓府食臘味的奶媽唱反調啊。
政府收晒菜園村（讓路俾虛耗庫房九百億兼割埋西九核心地段的高鐵）、鏟平橫洲村（與鄉紳惡霸摸完底不留紀錄的官員，枱頭的file堆得高過林鄭）和拉晒幫新界東北護村護田（企圖以竹枝撐開立法會大門而被覆核收監13個月）的文青男女之後，俾返添美道一小笪地你，叫你重擔鋤頭，任墾唔拘，保證無人拉。哈哈，門常開風水眾所周知，刻意種公民菜，擋得住煞？種瓜得瓜，開傘收傘，公民廣場永遠定格在2014年「重奪」那個晚上。重開廣場，政府無非是想洗刷那個奪字的淚印。
袁國強留給接班人的佔領運動九子案，明年開審，譚允芝之流又再獻世。出得嚟行的傘民心裏，公民廣場是回不去的，必然鎖死在歷史嗆喉的87枚催淚彈中，嘔白泡。