一句說話，絕對係一個時代嘅註腳。2017年，梁振英落台，林鄭喺部份反對聲中上場，「13+3」位年輕人因政治抗爭被判囚，背負着數以十萬計選票嘅4位立法會議員被DQ......喺呢個政治漩渦中，相信有唔少發言，令大家印象深刻，但以下幾句非一般「金句」，相信能夠成為今年非主流嘅「年度經典」。
第1位
「（搞港獨）啲人唔殺咗佢做咩， 『殺無赦』係嫉惡如仇……睇吓殺咩啦，殺豬殺狗唔係咩一回事。」—何君堯
外號西環契仔嘅立法會議員何君堯，今年9月搞反港獨集會，本來諗住聲討佔中發起人之一嘅戴耀廷，席間當然又同其他愛字頭一齊反港獨云云，點知成壇大龍鳳，最終火燒後欄，和應屏山鄉委會主席曾樹和喺「殺」字之後嘅「無赦」，令佢被全城追討，甚至有團體報警轟佢煽動暴力。雪上加霜嘅係，佢其後仲被揭發根本冇喺英國同新加坡執業，涉虛報資歷，搞到要道歉，喺立法會又被提出要譴責，殺氣騰騰反被殺。
第2位
「有一種行為，古今中外，都係犯法，就係殺人，而且會處以極刑。但有一個例外，古今中外，都有呢個例外，就係以國家名義殺人，係不犯法。」—梁振英
香港真係殺氣好重！已經落咗台嘅前特首梁振英，唔知係咪attention-seeking，擔心冇傳媒再關注佢？所以喺一個「國家與香港」、聚集唔少梁粉嘅研討會上，除咗提出個名字有個「華」、「國」字就係愛我中華呢個咁具「創意」嘅理論外（但又冇諗過，自己個名叫振英，即係振興英國咁大逆不道喎！），呢位曾經譴責六四屠城嘅親中紅人仲話呀，以國家名義殺人，係唔犯法，唔少人即席聽到都眼凸凸，唔知佢係咪未食藥？又抑或，咁先係真正「愛國」，莫非八方都要講句，真係抵佢榮升國家領導人？
第3位
「當香港主流意見同我嘅意見唔同，我一定會接受香港人嘅意見，如果香港人主流意見令到我再冇辦法擔任行政長官，我係會辭職。」—林鄭月娥
今年最令人肉緊嘅大戰，肯定係3.26特首選舉，林鄭月娥曾俊華胡國興，成個選舉期間都互相廝殺，擦出火花，其中林鄭喺3月中一個選舉論壇仲「語出驚人」。當時有現場觀眾當面問林鄭係咪相信香港人？若果香港主流意見同她不同，佢會如何處理？林鄭回應話如果民意令佢無法擔任特首，佢會辭職。嘩，講到咁勇猛，大家諗住走着瞧啦，點知呢句說話似乎出咗事，林鄭翌日已經急急補鑊，話自己唔係咁嘅意思，向來穩打穩紮嘅佢罕有失言。
第4位
「你（林鄭）同CY有好多相似地方，所以好多人叫你做CY 2.0，你有冇諗過點解……社會最擔心係你當選，香港社會會變做撕裂2.0。」—曾俊華
2017年嚟講，有林鄭就梗係要有曾俊華啦，兩個人喺年初為咗特首寶座，拼勁搏鬥咗近三個月，最終雖然一如所料，由獲北京支持嘅林鄭勝出成為禮賓府新主人，但坊間嘅民意支持嚟講，佢就被薯片叔大拋離。而喺選舉論壇上，多得一班「有料到」助選團隊，令氣勢如虹嘅薯片叔連番爆金句，尤其喺一個選舉論壇話呀，林鄭俾好多人話佢係CY 2.0，仲話佢係撕裂2.0，當時唔少人都被感染，覺得薯片叔所言甚是，從此林鄭都同CY 2.0不可分割，用一個標籤狠狠地「殺死」對手！
第5位
「我由低做起，出錢出力出心，唔通可以話我對香港社會冇擔當咩？」—葉劉淑儀
都是特首選舉惹的禍，各種人性盡顯露。呢句入選金句，係要配合葉劉嘅面部表情先至令人有feel。曾經係眾矢之的嘅佢，今年初以弱者姿態打算競逐特首寶座，點知被中央DQ嘅梁振英，只係大讚林鄭月娥有擔當，懶理呢位喺行會盡心盡力嘅同事，結果呢，為攞提名而嘗盡人情冷暖嘅葉劉聽罷覺得好委屈，自覺出咗嘅力被抹煞，忍唔住想喺鏡頭面前委屈爆喊，自問出錢出心出力，點可以話冇擔當？呢場梨花雨反而引起林鄭關注，之後都指葉劉有擔當，代689撫慰番葉劉㖭噃。
第6位
「我形容𠵱家係第二次世界大戰，我哋（警員）係猶太人，我哋𠵱家被迫害緊，（猶如）被德國納粹軍隊迫害緊我哋猶太人。」—陳姓警員
因為一啲歷史原因，「納粹迫害論」係唔可以亂用同亂講，免掀起唔少人嘅傷痛回憶，偏偏香港有警員，唔知係咪火遮眼，忘記咗一啲忌諱惹來風波。七位警員喺佔中期間喺暗角對公民黨前成員曾健超施襲，被判入獄兩年後，4個警察協會喺2月中搞咗個「晒馬大會」，出動半支警隊力挺七犯，其間有警員竟然喺發言時，將警隊比喻為二戰時被迫害、屠殺嘅猶太人，以色列同德國駐港領事館先後回應指，有關言論不恰當同令人遺憾，勢估唔到一個警員發言，會惹來國際關注咯！
第7位
「業主租咗間屋畀我，跟住發現原來佢自己唔夠用，佢問我（租客）『你可唔可以租番間房畀我？』呢個權力係可以有嘅。」—袁國強
被批評為「割地兩檢」的一地兩檢方案公佈後，政府推銷時，唔少言論嚇死人，除咗運房局局長陳帆話，喺西九總站嘅內地口岸區可以用本地SIM卡或利用翻牆軟件，破解內地網禁，搞到西環聽到眼都凸外，律政司司長袁國強更加話一地兩檢只係「租上租」，香港土地係國家嘅，香港將西九龍總站部份範圍租畀國家，有咩唔得？又確實，當人大下下用釋法或決定殺死真理同常理，又真係冇乜唔得！八方反而想知道，袁國強留任到幾時先走得？
李八方